கேரள மாநிலம் நெய்யாற்றின்கரையின் புதிய ஆயராக மேதகு செல்வராஜன் தாசன் அவர்கள் நியமிக்கப்பட்டுள்ளார்

புதிய டெல்லி | அக்டோபர் 18, 2025:

திருத்தந்தை 14ம் லியோ அவர்கள், முனைவர். D. செல்வராஜன் தாசன் அவர்களை நெய்யாற்றின்கரை மறைமாவட்டத்தின் ஆயராக நியமித்துள்ளார். முன்னதாக, பிப்ரவரி 8, 2025 அன்று, திருத்தந்தை பிரான்சிஸ் அவர்கள் இவரை அதே மறைமாவட்டத்தின் துணை ஆயராக (Coadjutor Bishop) நியமித்திருந்தார்.

ஆயர் செல்வராஜன் தாசன் அவர்கள், நெய்யாற்றின்கரை மறைமாவட்டத்திற்கு உட்பட்ட வலியவிளையில் ஜனவரி 27, 1962 அன்று பிறந்தார். புனித சூசையப்பர் பாப்பிறை குருத்துவக் கல்லூரியில் (St. Joseph’s Pontifical Seminary, Alwaye) தத்துவம் மற்றும் இறையியல் படிப்புகளை முடித்தார். அதைத் தொடர்ந்து, பெல்ஜியத்தில் உள்ள லூவைன் கத்தோலிக்கப் பல்கலைக்கழகத்தில் (Université Catholique de Louvain) திருச்சபைச் சட்டத்தில் முனைவர் பட்டமும் பெற்றார்.

திருவனந்தபுரம் உயர் மறைமாவட்டத்திற்காக டிசம்பர் 23, 1987 அன்று குருவாகத் திருநிலைப்படுத்தப்பட்ட ஆயர் செல்வராஜன் அவர்கள், பல்வேறு மேய்ப்புப் பணி மற்றும் நிர்வாகப் பொறுப்புகளில் திருச்சபைக்கு சேவை செய்துள்ளார்.

அவரது குருத்துவப் பணிகளில் பின்வருபவை அடங்கும்:

* புனித ஆல்பர்ட் ஆலயத்தின் பங்குத் தந்தை, முத்தியவிளை (1988–1994)

* திருவனந்தபுரம் உயர் மறைமாவட்ட மறைக்கல்வி இயக்குநர் (1991–1995)

* புனித யூதா ஆலயத்தின் பங்குத் தந்தை, சின்னத்துறை (1994–1995)

* புனித தெரசா ஆலயத்தின் பங்குத் தந்தை, மாணிக்காபுரம் (1995)

அவரது பணிக்காலத்தில், ஆயர் செல்வராஜன் அவர்கள் திருச்சபை நிர்வாகம் மற்றும் திருச்சபைச் சட்ட சேவைகளுக்கும் குறிப்பிடத்தக்க பங்களிப்பை அளித்துள்ளார். அவர் திருவனந்தபுரம் மறைமாவட்ட நீதிமன்றத்தில் பணியாற்றியிருக்கிறார், மேய்ப்புப் பணி இயக்குநராகவும் (2001–2003) பணியாற்றியுள்ளார். மேலும், அவர் மாமரலில் உள்ள புனித பவுல் ஆலயத்தின் பங்குத் தந்தையாகவும், மற்றும் பள்ளிகளின் இயக்குநராகவும் (2001–2008) பணியாற்றினார். இவை தவிர, அவர் நெய்யாற்றின்கரையின் திருச்சபையின் நீதிமன்றத்திலும் (2001–2011), மறை மாவட்ட ஆயரின் ஆலோசனைக் குழுவிலும் (College of Consultors) மற்றும் 2007 முதல் மறைமாவட்ட பொருளாதார விவகாரங்களுக்கான அமைப்பிலும் (Diocesan Council for Economic Affairs) உறுப்பினராகவும் இருந்துள்ளார்.

2008 முதல் 2014 வரை மறைமாவட்ட வேந்தராகவும் அமல உற்பவ அன்னை பேராலயத்தின் பங்குத் தந்தையாகவும் பணியாற்றினார். அதனைத் தொடர்ந்து, திரு இருதய ஆலயத்தின் பங்குத் தந்தையாகவும் மற்றும் லோசாக்னி மேய்ப்புப் பணி மையத்தின் இயக்குநராகவும் (2014–2019) பணியாற்றினார். 2019 முதல், ஆயர் செல்வராஜன் அவர்கள் திருப்புறத்தில் உள்ள புனித பிரான்சிஸ் சவேரியார் ஆலயத்தின் பங்குத் தந்தையாக இருந்தார்.

நெய்யாற்றின்கரை மறைமாவட்டத்தின் மேய்ப்புப் பணி ஆளுகையில் இருந்து விலகிய ஆயர் வின்சென்ட் சாமுவேல் அவர்களுக்குப் பின் துணை ஆயராக இருந்த ஆயர் செல்வராஜன் அவர்கள் ஆயராகப் பொறுப்பேற்கிறார்.

ஆயர் செல்வராஜன் அவர்களின் நியமனம், கேரளாவில் உள்ள திருச்சபைக்கான நீண்ட மற்றும் அர்ப்பணிப்புள்ள சேவையின் தொடர்ச்சியைப் பிரதிபலிக்கிறது. அவரது மேய்ப்புப் பணி அனுபவம், கல்விசார் ஆழம் மற்றும் பல்வேறு மறைமாவட்டப் பொறுப்புகளில் உள்ள தலைமைப் பண்பு ஆகியவை, விசுவாசத்திற்கும் அவரது பராமரிப்பில் ஒப்படைக்கப்பட்ட மக்களுக்கும் அவர் கொண்டுள்ள அர்ப்பணிப்புக்குச் சான்றாக அமைகின்றன.

மூலம்: CBCI