ലെയോ പാപ്പാ സ്‌പെയിനിലേക്ക്

മാഡ്രിഡ്: 2011-ല്‍ മാഡ്രിഡില്‍ നടന്ന ലോക യുവജനദിനത്തിലേക്ക് ബെനഡിക്ട് പതിനാറാമന്‍ പാപ്പാ പത്ത് ലക്ഷത്തിലധികം യുവാക്കളെ ആകര്‍ഷിച്ചിരുന്നു. ഒരു തലമുറയെ സ്വാധീനിച്ച ആ മഹാസമ്മേളനത്തിന് പതിനഞ്ച് വര്‍ഷങ്ങള്‍ക്ക് ശേഷം, ഇപ്പോള്‍ സ്‌പെയിന്‍ പുതിയ പാപ്പായായ ലെയോ പതിനാലാമനെ സ്വീകരിക്കാന്‍ ഒരുങ്ങുകയാണ്. എന്നാല്‍ ഈ ഇടവേളയില്‍ രാജ്യത്തിന്റെ മതപരമായ അന്തരീക്ഷത്തില്‍ വലിയ മാറ്റങ്ങളാണ് ഉണ്ടായിരിക്കുന്നത്.

മാഡ്രിഡിലെ കോംപ്ലൂട്ടെന്‍സ് സര്‍വകലാശാലയിലെ സമൂഹശാസ്ത്ര പ്രൊഫസറായ റാഫേല്‍ റൂയിസ് ആന്‍ഡ്രസ് പറയുന്നതനുസരിച്ച്, 21-ാം നൂറ്റാണ്ടിന്റെ തുടക്കത്തില്‍ ആരംഭിച്ച ''മൂന്നാം മതേതരവല്‍ക്കരണ തരംഗം'' നടക്കുന്ന കാലത്താണ് ബെനഡിക്ട് പതിനാറാമന്‍ സ്‌പെയിനിലെത്തിയത്.

''ഇന്നത്തെ സമൂഹം, പ്രത്യേകിച്ച് യുവജനങ്ങള്‍, മുമ്പത്തെക്കാള്‍ കുറച്ച് മതപരമാണ്. മതേതരവല്‍ക്കരണം കൂടുതല്‍ ശക്തിപ്രാപിച്ചിട്ടുണ്ട്,'' അദ്ദേഹം പറഞ്ഞു.

2025-ലെ ''സ്‌പെയിനിലെ മതവും വിശ്വാസങ്ങളും'' എന്ന റിപ്പോര്‍ട്ടനുസരിച്ച്, സ്‌പെയിനുകാരില്‍ 42 ശതമാനം പേര്‍ യാതൊരു മതവിശ്വാസവും പിന്തുടരുന്നില്ല. അതേസമയം ഏകദേശം 50 മുതല്‍ 56 ശതമാനം വരെ ആളുകള്‍ ഇപ്പോഴും മതവിശ്വാസികളാണ്; അതില്‍ ഭൂരിഭാഗവും കത്തോലിക്കരാണ്.

എന്നാല്‍ 2026-ലെ യുവജനങ്ങളില്‍ കത്തോലിക്ക വിശ്വാസത്തോടുള്ള പുതിയ താല്‍പര്യം വളരുന്നതിന്റെ സൂചനകള്‍ ഉണ്ടെന്ന് റൂയിസ് ചൂണ്ടിക്കാട്ടി. ''യങ് സ്പാനിയേഡ്‌സ് 2026'' റിപ്പോര്‍ട്ടനുസരിച്ച്, 38.4 ശതമാനം യുവാക്കള്‍ മതത്തെ ജീവിതത്തില്‍ ''വളരെ പ്രധാനപ്പെട്ടതോ പ്രധാനപ്പെട്ടതോ'' ആയി കാണുന്നു.

കത്തോലിക്കരായി സ്വയം തിരിച്ചറിയുന്ന യുവാക്കളുടെ ശതമാനവും വര്‍ധിച്ചിട്ടുണ്ട്. 2020-ല്‍ ഇത് 31.6 ശതമാനമായിരുന്നപ്പോള്‍ 2025-ഓടെ അത് 45 ശതമാനമായി ഉയര്‍ന്നു. 2011-ലെ ലോക യുവജനദിനത്തിന്റെ സംഘാടന ചുമതല വഹിച്ച സെഗോവിയയിലെ മുന്‍ ബിഷപ്പ് സീസര്‍ ഓഗസ്റ്റോ ഫ്രാങ്കോ മാര്‍ട്ടിനസ് പറഞ്ഞു: ''ഇന്നത്തെ യുവാക്കളും അന്നത്തെ യുവാക്കളും തമ്മില്‍ വലിയ സാമ്യമുണ്ട്. അവര്‍ സന്തോഷത്തോടെ ജീവിക്കാനും ലക്ഷ്യങ്ങള്‍ കൈവരിക്കാനും ആഗ്രഹിക്കുന്നവരാണ്; അതോടൊപ്പം വിശ്വാസവും അവര്‍ക്കുണ്ട്.''

2023-ലെ ലിസ്ബണ്‍ ലോക യുവജനദിനത്തെ ഓര്‍മ്മിപ്പിച്ച് അദ്ദേഹം പറഞ്ഞു: ''കാലം കടന്നുപോയിട്ടും യുവാക്കള്‍ അധികം മാറിയിട്ടില്ലെന്നു തോന്നി. അവിടെയും പതിനഞ്ച് ലക്ഷത്തോളം യുവാക്കളുണ്ടായിരുന്നു. അവരുടെ സമര്‍പ്പണവും സന്തോഷവും അതിശയകരമായിരുന്നു.'' 2011 കാലഘട്ടത്തില്‍ ലൈംഗികാവകാശങ്ങള്‍, ഗര്‍ഭച്ഛിദ്രം, സമലിംഗ വിവാഹം തുടങ്ങിയ വിഷയങ്ങളുമായി ബന്ധപ്പെട്ട ശക്തമായ ധ്രുവീകരണമാണ് യുവ കത്തോലിക്കരെ സ്വാധീനിച്ചിരുന്നതെന്ന് റൂയിസ് പറഞ്ഞു.

''2026-ലെ യുവാക്കള്‍ക്ക് സ്വന്തം വിശ്വാസത്തെക്കുറിച്ച് തുറന്നു സംസാരിക്കാന്‍ കൂടുതല്‍ സ്വാതന്ത്ര്യമുണ്ട്. കത്തോലിക്കനാകുന്നത് ഇപ്പോള്‍ കൂടുതല്‍ സ്വാഭാവികമായി അവര്‍ കാണുന്നു,'' അദ്ദേഹം നിരീക്ഷിച്ചു.

യുവജന പ്രസ്ഥാനങ്ങളും സോഷ്യല്‍ മീഡിയയിലൂടെയുള്ള അവരുടെ സ്വാധീനവും 2011-നേക്കാള്‍ 2026-ല്‍ വിശ്വാസത്തിന്റെ ദൃശ്യത വര്‍ധിച്ചതിന്റെ ഉദാഹരണങ്ങളാണെന്നും അദ്ദേഹം പറഞ്ഞു. ''യുവ കത്തോലിക്കരുടെ എണ്ണം കുറഞ്ഞിട്ടുണ്ടെങ്കിലും, സ്പാനിഷ് യുവജനങ്ങളും കത്തോലിക്ക സഭയും തമ്മില്‍ പുതിയൊരു സംഭാഷണ വാതില്‍ തുറക്കുകയാണ്,'' റൂയിസ് അഭിപ്രായപ്പെട്ടു.

മതേതരവല്‍ക്കരണം ശക്തമായിരുന്നാലും, പാരമ്പര്യം, ആത്മീയത, ജീവിതത്തിന്റെ അര്‍ത്ഥാന്വേഷണം തുടങ്ങിയവ ഇപ്പോഴും സ്പാനിഷ് സമൂഹത്തില്‍ അതീവ പ്രധാനപ്പെട്ട വിഷയങ്ങളാണെന്നും അദ്ദേഹം കൂട്ടിച്ചേര്‍ത്തു.