கிறிஸ்தவ ஆலயம் இடிப்பு: நீதிமன்ற விசாரணைக்கு முன்பே மேற்கொள்ளப்பட்ட நகராட்சியின் நடவடிக்கையை கேள்விக்குள்ளாக்கும் மக்கள்

பிம்ப்ரி-சின்ச்வாட், புனே, மகாராஷ்டிரா, செப்டம்பர் 11, 2026: காலேவாடியின் தப்கிர் மாலா பகுதியில் உள்ள ஒரு ஆலயம் நள்ளிரவில் மாநகராட்சி நிர்வாகத்தால் இடிக்கப்பட்டது. நீதிமன்றத் தடையுத்தரவு அமலில் இருந்தபோதும், வழக்கு விசாரணை நடைபெறவிருந்த சில நாட்களுக்கு முன்பாகவும் இந்த நடவடிக்கை மேற்கொள்ளப்பட்டதாக திருஅவை உறுப்பினர்கள் குற்றம் சாட்டியுள்ளனர்.

இந்த இடிப்பு நடவடிக்கையின் சட்டப்பூர்வத் தன்மை மற்றும் அது மேற்கொள்ளப்பட்ட நேரம் குறித்து ஆலய உறுப்பினர்களிடையே கேள்விகள் எழுந்துள்ளன. அதே வேளையில், காலேவாடியின் ராஜவாடே நகரில் அனுமதியற்ற கட்டுமானங்களுக்கு எதிரான நடவடிக்கையின் ஒரு பகுதியாகவே இக்கட்டடம் இடிக்கப்பட்டதாக பிம்ப்ரி-சின்ச்வாட் மாநகராட்சி (PCMC) தெரிவித்துள்ளது.

மாநகராட்சியின் கூற்றுப்படி, ஜி வார்டு அலுவலகத்தின் கீழ் செப்டம்பர் 7 அன்று இந்த இடிப்பு நடவடிக்கை மேற்கொள்ளப்பட்டு, சுமார் 7,400 சதுர அடி அளவிலான அனுமதியற்ற கட்டுமானம் அகற்றப்பட்டது.

இருப்பினும், இரவில் கட்டடம் இடிக்கப்படக்கூடும் என்ற தகவல் கிடைத்ததும் தாங்கள் உடனடியாக சம்பவ இடத்திற்கு விரைந்ததாக ஆலய உறுப்பினர்கள் தெரிவித்தனர். தாங்கள் வருவதற்கு முன்பாகவே அங்கு பெரும் போலீஸ் படையும் கனரக இயந்திரங்களும் குவிக்கப்பட்டிருந்ததாக அவர்கள் கூறினர்.

சுமார் 10 ஆண்டுகளாக இந்த ஆலயத்துடன் தொடர்பில் இருப்பதாகக் கூறிய ரோஸ், நீதிமன்றத் தடையாணை மற்றும் திங்கட்கிழமை நடைபெறவிருந்த விசாரணை குறித்து மாநகராட்சி அதிகாரிகளிடம் உறுப்பினர்கள் தெரிவித்ததாகக் கூறினார்.

"எங்களிடம் தடையாணை இருந்தது. விசாரணை திங்கட்கிழமை நடைபெறவிருந்தது. நீதிமன்றம் என்ன தீர்ப்பு அளித்தாலும் அதற்கு நாங்கள் ஒத்துழைப்போம்" என்று அவர் கூறினார்.

அதிகாரிகள் வளாகத்திற்குள் நுழைந்து, உறுப்பினர்களை அங்கிருந்து வலுக்கட்டாயமாக வெளியேற்றியதாக அவர் குற்றம் சாட்டினார். மேலும், இடிப்பு நடவடிக்கையைப் புகைப்படம் எடுக்கவோ அல்லது வீடியோ பதிவு செய்யவோ உறுப்பினர்கள் அனுமதிக்கப்படவில்லை என்றும், செல்போன்களைப் பறிமுதல் செய்வோம் அல்லது சேதப்படுத்துவோம் என்று மிரட்டப்பட்டதாகவும் அவர் தெரிவித்தார்.

மற்றொரு உறுப்பினரான சாம் கூறுகையில், கட்டடம் இடிக்கப்பட வாய்ப்புள்ளதை அறிந்து சுமார் 20 முதல் 25 பேர் அங்கு கூடி பிரார்த்தனை செய்யத் தொடங்கினர் என்றார். அதிகாலை சுமார் 3 மணியளவில் கனரக இயந்திரங்கள், மின் விளக்கு உபகரணங்கள் மற்றும் பெரும் போலீஸ் படை அங்கு வந்ததாக அவர் குறிப்பிட்டார்.

சாமுவின் கூற்றுப்படி, உறுப்பினர்கள் தங்கள் உடைமைகளை வெளியே எடுக்க முயன்ற போதிலும், இடிப்பு தொடங்குவதற்குள் அனைத்தையும் மீட்க முடியவில்லை.

"எங்கள் உடைமைகளில் பாதிக்கும் மேற்பட்டவை அங்கேயே விட்டுவிடப்பட்டன," என்று அவர் கூறினார்.

மேலும், 24 மணி நேர அல்லது 48 மணி நேர முன்கூட்டிய நோட்டீஸ் தங்களுக்கு வழங்கப்படவில்லை என்றும், அவ்வாறு வழங்கப்பட்டிருந்தால் தங்கள் பொருட்களை பாதுகாப்பாக எடுத்துச் சென்றிருக்க முடியும் என்றும் அவர் கூறினார்.

சுற்றுவட்டாரப் பகுதியில் பிற அனுமதியற்ற கட்டுமானங்கள் இருக்கும்போது, ஆலயத்தின் மீது மட்டும் பாரபட்சமான நடவடிக்கை எடுக்கப்பட்டதாகக் கூறி உறுப்பினர்கள் கேள்வி எழுப்பியுள்ளனர்.

"இது சட்டவிரோத கட்டுமானம் என்றால், ஆலயத்தைச் சுற்றி இன்னும் பல கட்டடங்கள் உள்ளன. அவையெல்லாம் சட்டவிரோத கட்டுமானங்கள் இல்லையா?" என்று சாம் கேள்வி எழுப்பினார்.

ஆக்கிரமிப்பு அகற்றும் துறை, பொறியியல் துறைகள் மற்றும் மண்டல அலுவலகங்களின் அதிகாரிகள் பங்கேற்புடன் இந்த நடவடிக்கை மேற்கொள்ளப்பட்டதாக மாநகராட்சி நிர்வாகம் தெரிவித்துள்ளது. இதில் 10 செயற்பொறியாளர்கள், 28 உதவிப் பொறியாளர்கள் மற்றும் இளநிலைப் பொறியாளர்கள், 16 சிவில் இன்ஜினியரிங் உதவியாளர்கள் ஈடுபட்டதாகக் கூறப்பட்டுள்ளது.

11 பொக்லைன் இயந்திரங்கள், ஐந்து ஜேசிபிக்கள் மற்றும் 25 களப் பணியாளர்கள் ஈடுபடுத்தப்பட்டதாக மாநகராட்சி தெரிவித்தது. சுமார் 55 மகாராஷ்டிரா பாதுகாப்புப் படை வீரர்கள் பாதுகாப்புப் பணியில் ஈடுபட்டனர்; மேலும் 12 தீயணைப்பு வாகனங்கள் மற்றும் ஒரு அவசர மருத்துவ ஊர்தி அவசர நிலைக்குத் தயாராக வைக்கப்பட்டிருந்தன.

மாநகராட்சியின் அறிக்கையில், ஆலய உறுப்பினர்கள் குறிப்பிட்ட நீதிமன்றத் தடையாணை அல்லது வழக்கு விசாரணை குறித்து நேரடியாக எதுவும் குறிப்பிடப்படவில்லை.

இந்த இடிப்பு நடவடிக்கை, அந்த நேரத்தில் நடைமுறையில் இருந்த ஏதேனும் நீதிமன்ற உத்தரவுகளுக்கும், நோட்டீஸ் வழங்குவது தொடர்பான தேவைகள் உள்ளிட்ட பொருந்தக்கூடிய மாநகராட்சி நடைமுறைகளுக்கும் இணங்கி அமைந்ததா என்பதே தற்போதைய முக்கியக் கேள்வியாக உள்ளது.

இச்சம்பவம் குறித்து செய்தி வெளியிட்ட 'தி ஃப்ரீ பிரஸ் ஜர்னல்' (The Free Press Journal), விரிவான விளக்கத்தைப் பெறுவதற்காக மூத்த மாநகராட்சி அதிகாரிகளைத் தொடர்பு கொள்ள மேற்கொண்ட முயற்சிகள் பலனளிக்கவில்லை என்று கூறியுள்ளது.

இடிப்பு நடவடிக்கையின் சட்ட அடிப்படை, நடவடிக்கைக்கு முன்பு வழங்கப்பட்ட நோட்டீஸ் மற்றும் திட்டமிடப்பட்ட நீதிமன்ற விசாரணைக்குச் சற்று முன்னதாக இந்த நடவடிக்கையை முன்னெடுத்ததற்கான காரணம் குறித்து மாநகராட்சி அதிகாரிகளிடமிருந்து ஆலய உறுப்பினர்கள் விளக்கம் கோரி வருகின்றனர்.

Courtesy : Free Press Journal