மனித மாண்பு குறித்த உரையாடலில், அருள்சகோதரிகளை குடிமைச் சமூகத்துடன் இணைத்த IDEAS மையம்

மதுரை, ஜூலை 28, 2026: விளிம்புநிலை சமூகங்களுடனான ஒத்துழைப்பை வலுப்படுத்தும் அதே வேளையில், செயற்கை நுண்ணறிவின் சவால்கள், மனித மாண்பு மற்றும் சமூக நீதி ஆகியவற்றை ஆராய்வதற்காக, 'மகத்தான மானுடம்' (Magnifica Humanitas) எனும் திருத்தூது மடல் குறித்த இரண்டு நாள் பயிலரங்கு ஒன்றில் அருள்சகோதரிகள் பங்கேற்றனர்.

புனித இஞ்ஞாசியார் திருநாளையொட்டி, இயேசு சபையினரின் நிறுவனமான ஐடியாஸ் மையம் ஏற்பாடு செய்திருந்த இந்தப் பயிலரங்கில், சமூக மற்றும் கல்விப் பணிகளில் ஈடுபட்டுள்ள 11 சபைகளைச் சேர்ந்த 41 அருள்சகோதரிகள் ஒன்றிணைந்தனர். ஐடியாஸ் (IDEAS) நிறுவனத்தின் பதினான்கு பணியாளர்கள் மற்றும் அருகிலுள்ள சமூகங்களைச் சேர்ந்த இயேசு சபையினரும் இதில் பங்கேற்றனர்.

தமிழ்நாட்டில் உள்ள சமயச் சமூகங்கள் மற்றும் சமூகப் பணியாளர்களின் செயல்பாட்டிற்கு 'மகத்தான மானுடம்' எந்த அளவிற்குப் பொருத்தமாக உள்ளது என்பதில் இப்பயிலரங்கம் கவனம் செலுத்தியது. அறநெறி இறையியலாளர் அருள்பணி. தினகரன் மற்றும் திருச்சிராப்பள்ளி புனித பவுல் இறையியல் கல்லூரியைச்  சேர்ந்த இறையியலாளர் அருள்பணி. சந்தியாகு ராஜா ஆகியோர் அமர்வுகளை வழிநடத்தியதுடன், மேய்ப்புப் பணி மற்றும் சமூகப் பணிகளில் இந்தத் திருத்தூது மடலின் தாக்கங்கள் குறித்து சிந்தித்தனர்.

செயற்கை நுண்ணறிவின் தாக்கத்தால் சமூகம் மாற்றமடைந்து வரும் இந்த வேளையில் திருத்தந்தை பதினான்காம் லியோ அவர்கள் ஏன் இந்தத் திருத்தூது மடலை வெளியிட்டார் என்பதைப் புரிந்துகொள்ள இந்த விகுப்புகள் தனக்கு உதவியதாக அருள்சகோதரி பாத்திமா ஆண்டனி கூறினார். "தொழில்நுட்பம் மனித குலத்திற்கு சேவை செய்ய வேண்டும் மற்றும் சமூக நீதியை மேம்படுத்த வேண்டுமே தவிர, மனித மாண்பை ஆதிக்கம் செலுத்தி அழிக்கக் கூடாது என்பதை மனதில் கொண்டு, விமர்சன சிந்தனையுடன் கூடிய மாணவர்கள், ஆசிரியர்கள் மற்றும் அருள்சகோதரிகளை உருவாக்க நான் விரும்புகிறேன்," என்று அவர் கூறினார்.

அருள்சகோதரிகள் மற்றும் குடிமைச் சமூக அமைப்புகளுக்கு இடையே நேரடி கலந்துரையாடலுக்கான தளத்தையும் இந்த பயிலரங்கம் உருவாக்கியது. அரசு சாரா நிறுவனங்களின் தலைவர்கள், வழக்கறிஞர்கள், ஆர்வலர்கள், பயிற்சியாளர்கள், ஐடியாஸ் மைய (IDEAS) திட்டங்களின் பயனாளிகள் மற்றும் திருநங்கை பங்கேற்பாளர் ஒருவர் உள்பட சுமார் 45 பங்காளர்கள் இந்த உரையாடலில் இணைந்தனர்.

இந்த கலந்துரையாடல், சமயப் பங்கேற்பாளர்களுக்கு, தற்போதைய சமூகத் தலையீடுகளைப் பற்றி அறிந்துகொள்ளவும், விளிம்புநிலை சமூகங்களுக்காகப் பணிபுரியும் குடிமைச் சமூகக் குழுக்களுடனான ஒத்துழைப்பை வலுப்படுத்துவதற்கான வழிகளை ஆராயவும் ஒரு வாய்ப்பை வழங்கியது.

சமூக இயக்கங்கள், பெண்கள் இயக்கங்கள், சமயச் சமூகங்கள் மற்றும் சமூக ஆர்வலர்களுக்கு இடையே ஐடியாஸ் நிறுவனம் ஒரு பாலமாகத் திகழ்கிறது என்று பிரான்சிஸ்கன் சிஸ்டர்ஸ் ஆஃப் பெர்பெச்சுவல் அடோரேஷனைச் சேர்ந்த அருள்சகோதரி ரோஸி விவரித்தார்.

"இருபது ஆண்டுகளுக்கும் மேலாக, நான் ஐடியாஸ் நிறுவனத்துடன் தொடர்பில் இருக்கிறேன். ஒவ்வொரு ஆண்டும் இந்தக் கொண்டாட்டத்தில் நான் பங்கேற்கிறேன், ஏனெனில் நான் புத்துணர்ச்சி பெறுவதாகவும், மற்ற சமூக ஆர்வலர்களுடனான எனது பிணைப்பு வலுவடைவதாகவும் உணர்கிறேன்," என்று அவர் கூறினார்.

இந்தச் சந்திப்பு, சமூகப் புறக்கணிப்பை எதிர்கொள்ளும் சமூகங்கள் மீதான தங்களின் சொந்த அழைப்பு மற்றும் பொறுப்பு குறித்து சிந்திக்கவும் பங்கேற்பாளர்களைத் தூண்டியது. ஆழ்ந்த சமூக மற்றும் சாதி அடிப்படையிலான ஒடுக்குமுறைகளை எதிர்கொள்ளும் அருந்ததியர்கள், கல் ஒட்டர்கள் மற்றும் குதிரை வண்ணார்கள் ஆகிய சமூகங்களிடையே பணிபுரியும் ஆர்வலர்கள் மற்றும் வழக்கறிஞர்களின் அர்ப்பணிப்பால் தான் ஈர்க்கப்பட்டதாக, 'இமாக்குலேட் கன்செப்ஷன்' சபையைச் சேர்ந்த அருள்சகோதரி இன்ஃபன்டா கூறினார். சமூக ஆர்வலர்களின் அனுபவத்தால் முன்வைக்கப்பட்ட சவாலைப் பற்றி சிந்தித்து, "இந்த மக்களுக்கு சேவை செய்ய நான் அழைக்கப்படவில்லையா?" என்று அவர் கேள்வி எழுப்பினார்.

பயிலரங்கம் அதன் இரட்டை நோக்கங்களான திருத்தூது மடலை அருள்சகோதரிகள் புரிந்துகொள்ள உதவுவதையும், சமயச் சமூகங்கள் மற்றும் குடிமைச் சமூகச் செயற்பாட்டாளர்களுக்கு இடையே வலுவான தொடர்புகளை உருவாக்குவதையும் எட்டியுள்ளதாக ஐடியாஸ் நிறுவனத்தின் தலைவரும் இயக்குநருமான அருள்பணி. ஜோசப் சேவியர் அவர்கள் தெரிவித்தார்.

பங்கேற்பாளர்கள் "புதிய ஆற்றல், ஆர்வம் மற்றும் அர்ப்பணிப்புடன்" நிகழ்ச்சியை முடித்ததாகக் கூறிய அவர், சமய மற்றும் குடிமைச் சமூகக் குழுக்களுக்கு இடையே பாலங்களை உருவாக்குவது ஐடியாஸ் நிறுவனப் பணியின் முக்கிய பரிமாணமாகத் தொடர்கிறது என்றும் கூறினார்.

மனித மாண்பைப் பாதுகாப்பதிலும், சமூக நீதியை மேம்படுத்துவதிலும், தொழில்நுட்ப வளர்ச்சியானது மனித குலத்தின் சேவையில் இருப்பதை உறுதி செய்வதிலும் சமயச் சமூகங்கள் மற்றும் குடிமைப் சமூகத்திற்கு இடையிலான ஒத்துழைப்பின் முக்கியத்துவத்தை இந்தக் கூட்டம் மீண்டும் உறுதிப்படுத்தியது.

By Catholic Connect Reporter