క్వెజోన్ సిటీలో ప్రారంభమైన ఆసియా కతోలిక డిజిటల్ మిషనరీల సమ్మేళనం

క్వెజోన్ సిటీ, ఫిలిప్పీన్స్, సెప్టెంబర్ 11, 2026: ఆసియా అంతటినుంచి 100 మందికి పైగా కతోలిక డిజిటల్ కమ్యూనికేటర్లు, కంటెంట్ క్రియేటర్లు, మీడియా నిపుణులు, గురువులు, మఠవాసులు, విశ్వాస ప్రభావకర్తలు క్వెజోన్ సిటీలో జరుగుతున్న తొలి ఆసియా కతోలిక డిజిటల్ మిషనరీల సమ్మేళనంలో పాల్గొంటున్నారు. డిజిటల్ రంగంలో కతోలికుల సహకారాన్ని, సువార్తా సేవను బలోపేతం చేయడం ఈ వాటికన్ మద్దతుతో నిర్వహిస్తున్న కార్యక్రమం ప్రధాన లక్ష్యం.

సెప్టెంబర్ 10 నుంచి 13 వరకు మెట్రో మనీలాలోని రేడియో వెరిటాస్ ఆసియా (RVA) ప్రాంగణంలో నాలుగు రోజుల పాటు ఈ సమ్మేళనం జరుగుతోంది. ఫెడరేషన్ ఆఫ్ ఏషియన్ బిషప్స్’ కాన్ఫరెన్సెస్ ఆఫీస్ ఆఫ్ సోషల్ కమ్యూనికేషన్స్ (FABC-OSC), రేడియో వెరిటాస్ ఆసియా సంయుక్తంగా ఈ కార్యక్రమాన్ని నిర్వహిస్తున్నాయి. వాటికన్ డికాస్టరీ ఫర్ కమ్యూనికేషన్‌కు చెందిన Fully Present Network భాగస్వామ్యంతో ఇది జరుగుతోంది.

“Influencers to Witnesses: A Synodal Way for Digital Mission in Asia” అనే ప్రధాన ఇతివృత్తంతో, అపొస్తలుల కార్యములు 4:20లోని “మేము చూసినవాటిని, విన్నవాటిని చెప్పకుండా ఉండలేము” అనే వాక్యాన్ని స్ఫూర్తిగా తీసుకుని ఈ సమ్మేళనం నిర్వహిస్తున్నారు. ఆసియా వ్యాప్తంగా డిజిటల్ వేదికల ద్వారా సువార్తను ప్రకటించేందుకు కట్టుబడిన డిజిటల్ మిషనరీల నెట్‌వర్క్‌ను అభివృద్ధి చేయడం దీని ఉద్దేశం.

సమ్మేళనం ప్రారంభంలో RVA త్రీ సెయింట్స్ చాపెల్‌లో స్వాగత దివ్యబలి జరిగింది. రేడియో వెరిటాస్ ఆసియా జనరల్ మేనేజర్ ఫాదర్ ఫెల్మార్ ఫీల్, SVD, దివ్యబలికి అధ్యక్షత వహించారు. మొత్తం 17 మంది గురువులు సహబలిగా పాల్గొనగా, వారిలో ఐదుగురు భారతదేశానికి చెందినవారు. సహబలిలో RVA ప్రోగ్రామ్ డైరెక్టర్, FABC-OSC ఎగ్జిక్యూటివ్ సెక్రటరీ ఫాదర్ జాన్ మి షెన్, CBCI ఆఫీస్ ఆఫ్ సోషల్ కమ్యూనికేషన్ ఎగ్జిక్యూటివ్ సెక్రటరీ ఫాదర్ సిరిల్ విక్టర్ జోసెఫ్ ఉన్నారు.

ఆసియా కతోలిక సంఘంలోని సాంస్కృతిక వైవిధ్యాన్ని ప్రతిబింబిస్తూ ప్రతినిధులు తమ తమ దేశాల సంప్రదాయ దుస్తులు ధరించి ప్రారంభ కార్యక్రమంలో పాల్గొన్నారు.

ఇన్‌ఫ్లుయెన్సర్ల నుంచి క్రీస్తుకు సాక్షులుగా

తన ప్రసంగంలో ఫాదర్ ఫీల్ ఇటీవల జకార్తాలో జరిగిన FABC ప్లీనరీ అసెంబ్లీని ప్రస్తావిస్తూ, ఆసియాలోని భిన్న భాషలు, సంస్కృతులు, చరిత్రలు, రాజకీయ వ్యవస్థలు, మత సంప్రదాయాల మధ్య చర్చి తన మిషన్‌ను “వంతెనలు – వంతెన నిర్మించేవారు” అనే భావనతో కొనసాగించాలని వివరించారు.

ఫిలిప్పీన్స్‌లో సాధారణంగా కనిపించే పెదవులతో చూపించే ప్రత్యేక సంజ్ఞను ఉదాహరణగా తీసుకుని, డిజిటల్ మిషనరీలు “మన పోస్టుల ద్వారా చూపిద్దాం” అని ఆయన పిలుపునిచ్చారు. ప్రత్యక్షంగా చర్చి వద్దకు రాలేని ప్రజలు, ముఖ్యంగా వృద్ధులు, లైవ్‌స్ట్రీమింగ్ ద్వారా దివ్యబలిలో పాల్గొనే అవకాశం పొందడం డిజిటల్ కమ్యూనికేషన్ ద్వారా చర్చి తన సేవా ఉనికిని ఎలా విస్తరించగలదో చూపిస్తుందని ఆయన అన్నారు.

అయితే డిజిటల్ మిషన్‌ను స్వీయ ప్రచారంగా మార్చకూడదని ఫాదర్ ఫీల్ హెచ్చరించారు.

“మనం మన వైపే చూపిస్తే ఇన్‌ఫ్లుయెన్సర్లుగానే మిగిలిపోతాం. కానీ మన జీవితం, మన కథలు, మన సృజనాత్మకత, మన డిజిటల్ వేదికలు ప్రజలను యేసు వైపు చూపిస్తే, అప్పుడు మనం సాక్షులుగా మారుతాం” అని ఆయన అన్నారు.

కొరింథీయులకు రాసిన మొదటి లేఖలో సెయింట్ పౌలు బోధనలను ప్రస్తావిస్తూ, డిజిటల్ సువార్తా ప్రచారం ప్రేమ, క్రైస్తవ సమాజంతో అనుబంధం, నిజమైన విశ్వాస సాక్ష్యంపై ఆధారపడాలని, కేవలం గుర్తింపు లేదా ప్రజాదరణ కోసం కాకూడదని ఆయన స్పష్టం చేశారు.

నిజమైన ప్రభావం చూపాలని కార్డినల్ టాగ్లే పిలుపు

స్వాగత, సాంస్కృతిక కార్యక్రమాల్లో సంప్రదాయ ఆసియా నృత్యాలు, రేడియో వెరిటాస్ ఆసియా చరిత్ర, సేవలను పరిచయం చేసే కార్యక్రమం, కార్డినల్ ఆంటోనియో టాగ్లే వీడియో సందేశం చోటుచేసుకున్నాయి.

డిజిటల్ మిషనరీల జీవితాల్లో యేసు, ఆయన వాక్యమే ప్రధాన ప్రభావాన్ని చూపాలని కార్డినల్ టాగ్లే పిలుపునిచ్చారు. క్రీస్తుతో నిజమైన సంబంధం ఉన్నప్పుడే ఇతరులపై అర్థవంతమైన ప్రభావాన్ని చూపగలమని ఆయన అన్నారు.

Laudato si’ సందేశాన్ని, సృష్టి పరిరక్షణ పట్ల శ్రద్ధను ప్రోత్సహించేందుకు రేడియో వెరిటాస్ ఆసియా, FABC-OSC సంయుక్తంగా నిర్వహించిన షార్ట్‌ఫిల్మ్ పోటీలో తుది దశకు చేరిన మూడు చిత్రాలను కూడా పాల్గొనేవారు వీక్షించారు.

ఈ సమ్మేళనంలో ఆసియా, ఇతర ప్రాంతాల నుంచి పలువురు ప్రముఖులు ప్రసంగిస్తున్నారు. వారిలో శాన్ పాబ్లో బిషప్ మార్సెలినో ఆంటోనియో మారలిట్ జూనియర్, వాటికన్ డికాస్టరీ ఫర్ కమ్యూనికేషన్‌కు చెందిన డాక్టర్ నటాసా గోవేకర్, ఫాదర్ జాన్ మి షెన్, ఫాదర్ కొలంబా జోర్డాన్, CFR, SIGNIS ఫిలిప్పీన్స్‌కు చెందిన పీ మబాంటా-ఫెనోమెనో ఉన్నారు.

అలాగే వరల్డ్ యూత్ డే సియోల్ 2027 స్థానిక ఆర్గనైజింగ్ కమిటీ ప్రతినిధులు, SIGNIS/LICAS News‌కు చెందిన పీటర్ మోంథియెన్‌విచియెన్‌చై, CAMECOకు చెందిన మైఖేల్ అన్‌లాండ్, CBCP ECSC/EWTNకు చెందిన ఎడ్విన్ లోపెజ్, డాక్టర్ అన్నా జిహ్యున్ యూ, ఫాదర్ ఫెల్మార్ ఫీల్, డాక్టర్ సిరిల్ విక్టర్ జోసెఫ్ తదితరులు కూడా ప్రసంగించనున్నారు.

త్రీ సెయింట్స్ చాపెల్‌లో సాయంత్ర ప్రార్థనలను ఫాదర్ కొలంబా జోర్డాన్, CFR నిర్వహించారు. అనంతరం FABC-OSC ఛైర్మన్ బిషప్ మార్సెలినో ఆంటోనియో “జూనీ” మారలిట్ జూనియర్ ఆధ్వర్యంలో సక్రమెంటల్ ఆరాధన జరిగింది.

ఆన్‌లైన్ ప్రభావం, వ్యక్తిగత ప్రచారం అనే సంస్కృతి నుంచి కతోలిక డిజిటల్ కమ్యూనికేషన్‌ను మరింత లోతైన క్రైస్తవ సాక్ష్యంగా మార్చడం ఈ సమ్మేళనం ప్రధాన లక్ష్యం. డిజిటల్ వేదికలను తమపై ప్రజల దృష్టిని ఆకర్షించడానికి కాకుండా, ప్రజలను యేసు మరియు సువార్త వైపు నడిపించేందుకు ఉపయోగించాలని పాల్గొనేవారిని ఈ సమ్మేళనం ప్రోత్సహిస్తోంది.

– కతోలిక్ కనెక్ట్ ప్రతినిధి