கனடாவில் பேராயராகத் திருநிலைப்படுத்தப்பட்ட தமிழ்நாட்டு அருள்பணியாளர் சூசை ஜேசு அவர்கள்

கனடா, ஜனவரி 30, 2026:

தமிழ்நாட்டின் சிவகங்கை மறைமாவட்டத்தைச் சேர்ந்த அமல மரி தியாகிகள் (OMI) சபையின் அருள்தந்தை சூசை ஜேசு அவர்கள், கனடாவின் கீவாட்டின்-லே பாஸ் (Keewatin-Le Pas) உயர்மறைமாவட்டத்தின் பேராயராக ஜனவரி 26 அன்று திருநிலைப்படுத்தப்பட்டு, முறைப்படி அப்பொறுப்பை ஏற்றுக்கொண்டார்.

இந்தத் திருநிலைப்படுத்தல் நிகழ்வு உள்ளூர் திருச்சபைக்கு ஒரு முக்கியமான தருணம் என்று அந்த உயர்மறைமாவட்டத்தின் தற்காலிக நிர்வாகி பேராயர் முர்ரே சாட்லெய்ன் குறிப்பிட்டார். "இது எங்கள் மறைமாவட்டத்திற்கு மகிழ்ச்சியும் நம்பிக்கையும் நிறைந்த நாள். நீண்டகாலப் பங்குமக்கள், குடும்பங்கள் மற்றும் நண்பர்கள் என அனைவரையும் இந்த விசுவாசம், சேவை மற்றும் சமூகத்தின் கொண்டாட்டத்தில் பங்கேற்குமாறு அழைக்கிறோம்," என்று அவர் கூறினார்.

தனது திருநிலைப்படுத்தலுக்கு முன்னதாகப் பேசிய பேராயர் சூசை ஜேசு, தனது புதிய பொறுப்பை ஏற்கத் தயாராக இருப்பதை வெளிப்படுத்தினார். "உங்கள் பேராயராகப் பணியாற்றுவதை நான் பெருமையாகக் கருதுகிறேன். கடந்த தசாப்தங்களில், வடக்கு சாஸ்காட்செவன் மற்றும் கனடா முழுவதிலும் உள்ள சமூகங்களின் விசுவாசம் மற்றும் மன உறுதியை நான் கண்டுள்ளேன். குறிப்பாகப் பழங்குடியின சமூகங்களுடன் இணைந்து, குணப்படுத்துதல், நல்லிணக்கம் மற்றும் பகிரப்பட்ட பணியில் பயணிக்க நான் ஆவலுடன் காத்திருக்கிறேன்," என்றார்.

வாழ்க்கை பின்னணி

அருள்தந்தை சூசை ஜேசு, மே 17, 1971 அன்று தமிழ்நாட்டின் புஷ்பவனத்தில் பிறந்தார். ஜூலை 27, 2000 அன்று காஞ்சிபுரம் அமலமரி ஆலயத்தில், சென்னை-மயிலை உயர்மறைமாவட்டப் பேராயர் லாரன்ஸ் பயஸ் அவர்களால் குருவாகத் திருநிலைப்படுத்தப்பட்டார்.

'அமல மரி தியாகிகள்' (OMI) சபையின் உறுப்பினரான இவர் தமிழ், ஆங்கிலம் மற்றும் கிரீ (Cree - பழங்குடியின மொழி) ஆகிய மொழிகளில் சரளமாகப் பேசக்கூடியவர். இந்தியாவில் உளவியலில் முதுகலைப் பட்டமும், ஒட்டாவாவில் உள்ள செயின்ட் பால் பல்கலைக்கழகத்தில் உளவியல் மற்றும் ஆன்மீகத்தில் முதுகலைப் பட்டமும் பெற்றுள்ளார். 2007-ல் கனடாவுக்குச் சென்ற இவர், பின்னர் அந்நாட்டின் குடியுரிமையைப் பெற்றார்.

முக்கிய பணிகள்

* கனடாவில் இவரது பணி பெரும்பாலும் பழங்குடியின மற்றும் நகரப்புற ஏழை சமூகங்களை மையமாகக் கொண்டிருந்தது.

* 2017 முதல் 2025 வரை எட்மண்டனில் உள்ள 'சேக்ரட் ஹார்ட் சர்ச் ஆஃப் தி ஃபர்ஸ்ட் பீப்பிள்ஸ்' தேவாலயத்தின் பங்குத்தந்தையாகப் பணியாற்றினார்.

* பழங்குடியினருடனான நல்லிணக்க முயற்சிகளுக்காக திருத்தந்தியை சந்திக்க ரோம் சென்ற குழுவில் இடம்பெற்றிருந்தார்.

* 2022-ஆம் ஆண்டு கனடா வருகை தந்த திருத்தந்தை பிரான்சிஸ் அவர்களைத் தனது பங்கிற்கு வரவேற்கும் வாய்ப்பைப் பெற்றார்.

பேராயராக நியமிக்கப்படும் வரை, அவர் எட்மண்டன் உயர்மறைமாவட்டத்தில் பல்வேறு பங்குகள் மற்றும் பழங்குடியின மக்களுக்கான பணிகளில் பணியாற்றி வந்தார்.

நன்றி: கீவாட்டின்-லே பாஸ் உயர்மறைமாவட்டம்.