அரசியல் என்பது கருணையின் செயலாக இருக்க வேண்டும் – திருத்தந்தை உரை

வத்திக்கான், ஜூன் 24, 2025 – அரசாங்கங்களுக்கான யூபிலி விழா நிகழ்வில் திருத்தந்தை லியோ XIV அவர்கள் உலகின் பல நாடுகளிலிருந்து வந்த அரசியல்வாதிகளிடம் உரையாற்றினார். அவர் புனித தாமஸ் மோர் அவர்களை இன்றைய அரசியல்வாதிகளுக்கான முன்னுதாரணமாகச் சுட்டிக்காட்டினார். உண்மைக்கு எதிராகச் செல்வதை விடத் தம் உயிரைக் கொடுக்கத் தயாரான தாமஸ் மோரின் தைரியத்தை திருத்தந்தை புகழ்ந்தார்.

திருத்தந்தை லியோ XIV அவர்கள், அரசியல் என்பது சமுதாயத்தின் நலனுக்காகச் செய்யப்படும் சேவையாகும் என்பதால், அது உயரிய கருணையின் செயலாகப் பார்க்கப்பட வேண்டும் என்றார். அவர் அரசியல்வாதிகளுக்காக மூன்று முக்கியக் கூறுகளை வலியுறுத்தினார்:

1.     பொதுநலனை விரும்பிப் பாதுகாத்திடுங்கள் – குறிப்பாகப் புறக்கணிக்கப்பட்ட மற்றும் எளிய மக்களுக்காகப் பணியாற்றுங்கள். சிலரிடம் செல்வம் அதிகமாகச் சேர்ந்து, பலர் வறுமையில் வாழும் நிலை நீடித்தால், அது சமுதாயத்தில் நியாயமற்ற நிலைகளை உருவாக்கி, வன்முறையையும் பின்னர் போரையும் ஏற்படுத்தும் என அவர் எச்சரித்தார்.

2.     மத சுதந்திரத்தைப் பாதுகாத்து, மதங்களுக்கு இடையிலான மரியாதைமிகு உரையாடலை ஊக்குவிக்கவும் – இறைவனில் நம்பிக்கை மற்றும் அதனிடமிருந்து வரும் நற்குணங்கள், தனிநபருக்கும் சமுதாயத்திற்கும் ஒரு பெரிய ஆசீர்வாதமாக அமையும் என திருத்தந்தை கூறினார்.

3.     இயற்கைச் சட்டத்தையே அடிப்படையாகக் கொள்ளுங்கள் – இது எல்லா இடங்களிலும், எல்லாக் காலங்களிலும் பொருந்தக்கூடிய ஒரு உண்மை நெறியாகும். அரசியல் முடிவுகள் நேர்மையையும், மனித கௌரவத்தையும் பாதுகாக்க இச்சட்டம் வழிகாட்டியாக அமையும். மேலும், மனித உரிமைகள் உலகப் பிரகடனம் (1948) என்பதும் ஒருவரின் முழுமையான மனித மதிப்பை நிலைநிறுத்த உதவும் முக்கிய ஆவணமாகும் என்றும் திருத்தந்தை நினைவூட்டினார்.

செயற்கை நுண்ணறிவு பற்றியும் அவர் பேசினார். இது சமுதாயத்திற்குப் பலனளிக்கக்கூடியதாக இருக்கலாம் என்றாலும், மனிதர் என்ற அடையாளத்தையும், அவரின் கௌரவத்தையும், அடிப்படை சுதந்திரத்தையும் பாதிக்கக்கூடாது என்றார். "நிறைய தரவுகளைச் சேமிக்கக்கூடியதும், பல கேள்விகளுக்குப் பதில் கூறக்கூடியதும் இயந்திரங்களால் இயன்றாலும், அவை மனித நினைவாற்றலுக்கு நிகராக இருக்க முடியாது" என அவர் வலியுறுத்தினார்.

இறுதியாக, அரசியல்வாதிகள் புனித தாமஸ் மோரி அவர்களின் வாழ்வையும் சாட்சியத்தையும் முன்வைத்துக்கொள்ள வேண்டும் என அவர் கேட்டுக்கொண்டார். உண்மைக்கு நன்றி செலுத்தி, ஏழைகள், குடும்பங்கள், இளம் தலைமுறையின் நலனுக்காக அவர் ஈடுபட்டதை திருத்தந்தை லியோ XIV அவர்கள் பாராட்டினார். அவர் தனது அப்போஸ்தல ஆசீர்வாதத்தை அளித்து, புனித தாமஸ் மோரின் வாழ்க்கை இன்றைய அரசியல்வாதிகளுக்கு ஊக்கமும் வழிகாட்டியுமாக அமையட்டும் என்று வேண்டினார்.

மரியாதையுடன்: வத்திக்கான் செய்தி